Bakı Mühəndislik Universiteti (BMU) və İNHA Universiteti arasında icra olunan ikili diplom proqramı (İDP) çərçivəsində təhsillərinin sonuncu kursunu Koreya Respublikasında davam etdirən tələbələrlə görüş keçirilib.
Görüşdə BMU-nun rektoru Yaqub Piriyevin rəhbərliyi ilə Koreyada səfərdə olan nümayəndə heyətinin digər üzvləri də iştirak edib.
Tələbələri salamlayan, onları IV kurs üzrə təhsillərini Koreyada davam etdirmək imkanı qazanmaları münasibətilə təbrik edən Yaqub Piriyev ölkənin strateji sahələrinin yüksək səviyyəli və rəqabət qabiliyyətli kadr potensialı ilə təminatında ikili diplom proqramlarının rolundan danışıb. Azərbaycan Prezidenti İlham Əliyevin rəhbərliyi altında işğaldan azad edilmiş ərazilərin dirçəlişi istiqamətində quruculuq, bərpa və yenidənqurma işlərinin sürətləndirilməsindən söz açan rektor burada qoyulan hədəflərə nail olunmasında, sözügedən ərazilərin kadr tələbatının ödənilməsində İDP məzunlarından istifadənin faydalı ola biləcəyini vurğulayıb.
BMU-İNHA İDP-nin icrasına toxunan rektor tələbələrin də üzərinə böyük məsuliyyət düşdüyünü, eyni zamanda onların ixtisaslı mütəxəssis kimi yetişdirilməsinə hər zaman dəstək veriləcəyini qeyd edib.
Bakı Mühəndislik Universitetinin tədris işləri üzrə prorektoru Həmzağa Orucov və beynəlxalq əlaqələr üzrə prorektoru Ətrabə Gül çıxışlarında tələbələrin tədris prosesi zamanı yaranan problemlərinə toxunub, həlli istiqamətində öz tövsiyyələrini verib.
Görüşdə BMU-İNHA İDP-nin proqram direktoru Humay Cəfərli və proqram katibi Nurlan Astanov tələbələrin gündəlik məsələləri ilə bağlı yaranmış suallarını cavablandırıblar.
Məlumat üçün bildirək ki, 3+1 modelinə əsaslanan İDP çərçivəsində tələbələr 3 ili BMU-da, sonuncu kursu isə İNHA Universitetində təhsil alırlar. Hazırda İnşaat mühəndisliyi, İnformasiya texnologiyaları, Elektrik mühəndisliyi və Elektronika mühəndisliyi ixtisasları üzrə İNHA Universitetində 83 tələbə təhsil alır. Tələbələrin yaşayış, təhsil, səfər və sığorta xərcləri "2019-2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı” çərçivəsində ödənilir.
Qeyd edək ki, Azərbaycan nümayəndə heyətinin Koreya Respublikasına səfəri BMU-İNHA İDP-nin qərarverici orqanı olan Rəhbər Komitənin növbəti iclasında iştirak etmək məqsədilə təşkil olunub.